पुस्तकालयले दियो खुसी

कृष्ण आचार्य /स्मिता मगर

काठमाडौं, लप्से भँगेरीकी सुनीला गुरुङ पुस्तकालयमा नयाँनयाँ किताब देखेर उत्साहित छिन् । कक्षा ६ मा अध्ययनरत उनले भनिन्, 'साथी मिलेर सबैभन्दा पहिले 'बुद्धिमान बाँदर' पढ्ने योजना बनाएका छौं । अनि त्यसपछि 'अंग्रेजी बोलचाल अभ्यास' भन्ने किताब पढ्नुपर्ला ।'

उनीमात्र होइन, गोरखाको कणर्ाली भनेर चिनिने श्रीनाथकोट गाविसको चन्द्रोदय निम्न माध्यामिक विद्यालयमा पुस्तकालय पुगेपछि त्यहाँका करिब एक हजार विद्यार्थीले यस्तै योजना बनाएका छन् । बालबालिकामात्र होइन पुस्तकालय स्थापना भएपछि शिक्षकहरू पनि हषिर्त छन् । 'पुस्तकालयमा बालबालिकालाई मात्र होइन हामीलाई पनि सहयोग गर्ने किताबहरू भएकाले हामीलाई धेरै खुसी लागेको छ,' शिक्षक मानबहादुर गुरुङले भने ।

पुस्तकालय फोगलामनामक गैरसरकारी संस्थाको आर्थिक सहयोगमा आदिवासी मानवअधिकार सरोकार केन्द्रले स्थापना गरेको हो । आइतबार पुस्तकालयको उद्घाटन गर्न राष्ट्रगानका रचयिता व्याकुल माइला  श्रीनाथकोटको सिम्ले पुगेका थिए । हरेक कुनामा रहेका बालबालिकाले राम्रो शिक्षा पाउन जरुरी रहेको बताउँदै राईले भने, 'यो पुस्तकालयले बालबालिकालाई क्षमतावान नागरिक बन्न सहयोग गर्ने विश्वास छ ।'

अभिभावक समितिका सदस्य ताराबहादुर लामिछानेले समयको गतिसँगै अगाडि बढ्न पुस्तकालय जरुरी रहेको बताए । पूर्व इन्डियन आर्मीसमेत रहेका लामिछानेले भने, 'वृद्ध अवस्थामा भए पनि पुस्तक पढेर समय बिताउन पाइने भयो ।'

पुस्तकालयमा शैक्षिक सत्रका किताबबाहेक साहित्य, कृषि, विज्ञान, कानुन गरी तीन सय ३६ प्रकारका आठ सय किताब र विज्ञानसम्बन्धी उपकरण छ । बाहुन, क्षेत्री, गुरुङ, दलित र बराम जाति बसोवास गर्ने आर्थिक रूपले विपन्न यो क्षेत्रमा स्थापना भएको यो पहिलो पुस्तकालय हो ।

आर्थिक अवस्था, साक्षरताको स्थिति र भौगोलिक दुर्गमता हेरेर फोेगलामले विभिन्न स्थानमा पुस्तकालय स्थापना गर्दै आएको छ । उक्त गैरसरकारी संस्थाले रुकुमको झुम्लाबाङ र भोजपुरको वोयामा पुस्तकालय स्थापना गरिसकेको छ भने दोलखाको हिलेपानी र चिसापानीमा स्थापना गर्ने तयारीमा रहेको सरोकार केन्द्रका महासचिव राजु गुरुङले बताए ।

जेष्ठ १, २०६६

साभार: कान्तिपुर राष्ट्रिय दैनिक

Posted on: 2009-05-14 21:07:52

------------------------------------------------------------------