तितौराका स्वादेहरू

स्मिता मगर

काठमाडौं, एक हुल ग्राहक पसलबाट गइसकेकै हुन्न, अर्को हुल आइपुग्छ । पछिल्लो हुलमा साथिसँगीमाझ खितखिताउँदै पसल छिरेकी सृजना श्रेष्ठ डब्बाका डब्बा गुलियो, पिरो, अमिलो र नुनिलो तितौरा देख्नासाथ हाँस्न छाडेर मुख मिठ्याउँछिन् ।

मुखै रसाउने तितौरा देखेर सृजनासँगै उनका साथीहरू कुनचाहिं स्वाद खाने भनेर डब्बा नियाल्न सुरु गर्छन्, लप्सी झोलदेखि, आँप, अमला, तित्री आदिका परिकार । उनीहरू मनपर्ने परिकार छान्दै गए । हुलमा सृजनाले लप्सीको झोल छानिन् भने अर्कीले खोर्सानीको 'खट्टीमिठ्ठी' झोल रुचाइन् ।

'यत्तिले प|mेस त बनायो तर मन भरिएन, अझै खानुपर्‍यो' भन्दै उनले अर्को प्याकेट पनि किनेर खान सुरु गरिन् । हप्तामा दुई/तीनपटक त्रिपुरेश्वरस्थित रत्नपार्क पाउँ भण्डारमा तितौरा खान छिर्ने सृजना अमिलो र पिरो तितौरा खान धेरै रुचाउँछिन् रे । खान सुरु गरेपछि रोक्न गाह्रो हुने बताउने उनी तितौरा धेरै खाएर पेट दुखेको र पछि कलेजसम्म छाड्नुपरेको अनुभव सुनाउँछिन् ।

'म पेट दुखेको सहन सक्छु तर तितौरा नखाएर चाहिं बस्न गाह्रो छ,' उनले भनिन् । 

युनाइटेड वल्र्ड ट्रेड सेन्टरस्थित पाउँ भण्डारमा बेच्न बसेकी रसना श्रेष्ठले तितौरा किन्न आउने भीडमा सास फेर्ने समय पनि पाइरहेकी थिइनन् । ग्राहकलाई  तितौरा दिंदै  रसनाले पसलमा तितौरा किन्न केटाहरू पनि उत्तिकै आउने गरेको बताइन् ।

'केटा पनि मुख मिठ्याउँदै आउँछन् र जिब्रो फट्कार्दै जान्छन्,' रसना भन्छिन् । नेवारीमा ल्यासी पाउँ -तरुनी) तितौराको लोकपि्रयता पहिलेभन्दा अहिले केटामाझ बढेको उनले सुनाइन् । 'केटीले मात्रै खाने मान्यता रहेकाले धेरैजसो केटा खुलेर तितौरा खान्छौं भन्न हिच्किचाइरहेका हुन्छन्,' रसनाको बुझाइ थियो । केटाहरू भने कहिले दिदीबहिनी त कहिले गर्लफ्रेन्डका लागि किनेको बहानामा तितौरा स्वाद लिने गरेका रहेछन् । त्यही भीडमा साथीहरूसँग तितौरा किन्दै गरेका सुदिस निरौलाले भने, 'तितौरा केटीले मात्र खानुपर्छ भन्ने छैन ।' 

स्कुले जीवनदेखि नै नजिकैको पसलमा साथीहरूसँग तितौरा किनेर खाने गरेका विराटनगरका सुदिसले अहिले आमाले घरैबाट तितौरा बनाएर पठाइदिने गरेको बताए ।

'अमला, ज्वानो, ल्वाङ आदि मिलाएर बनाएको तितौराले पाचनक्रियालाई राम्रो गर्ने भएकाले दैनिक रूपमा तितौरा खान्छु,' उनले भने ।

पिरो र अमिलो तितौराचाहिं साथीहरूले दिँदामात्र खाने तर किनेर खाँदा आँपको गुलियो तितौरा एकदमै मन पराउने सुदिसले बताए ।

चैत १८, २०६५

साभार:कान्तिपुर नेपाली राष्ट्रिय दैनिक

Posted on: 2009-03-30 19:33:40

--------------------------------------------------